FAMILIAK · BIZIKASI
BAT taldea
Bullying-aren aurkako taldea
BAT Bizikasi ekimenaren barruan sortutako taldea da, gure ikastola guztiontzat leku segurua izan dadin.
01 · Zer da
Zer da BAT taldea?
Bere helburua ikasleen arteko jazarpen- edo tratu txarreko egoerak prebenitzea, antzematea eta horien aurrean esku hartzea da. Baina BATek ez du arazoren bat dagoenean bakarrik jarduten: bizikidetza positiboa ere lantzen du, errespetuan, zaintzan eta elkarbizitzan oinarritutako giroa sortzeko.
BAT taldeak bi lan nagusi ditu:
-
1. Jazarpen-egoeretan esku hartzea
Jazarpen-egoera bat dagoenean, egoera aztertzeko eta konpontzeko prozesua koordinatzen du. Horretarako, beharrezkoa den informazioa biltzen du, inplikatutako pertsonekin hitz egiten du eta ikastolako profesionalekin batera erabakiak hartzen ditu.
-
2. Bizikidetza hobetzea
BAT taldeak ez du arazo bat sortzen denean bakarrik lan egiten. Ikastolan giro ona eta bizikidetza positiboa sustatzeko ekintzak ere bultzatzen ditu. Horretarako, ikasleen, irakasleen eta beste kideen iritziak eta proposamenak kontuan hartzen ditu.
02 · Zertan laguntzen du
BAT taldeak zertan laguntzen digu?
Denok dugu ikastolan seguru, errespetatu eta lagunduta sentitzeko eskubidea.
- Zerbait ondo ez dagoenean antzematen.
- Laguntza eskatzen eta behar dugunean hitz egiten.
- Egoera zailak bizi dituenari laguntzen eta babesten.
- Jazarpena, umiliazioa edo bazterketa ez normalizatzen eta ez onartzen.
Oso garrantzitsua den zerbait: bizikidetza guztion ardura da.
Ez dugu zertan jazarpena jasaten ari den pertsona izan laguntzeko. Egoera baten lekuko bagara, zerbait egin dezakegu. Isilik ez geratzea ere laguntzea da.
03 · Nork osatzen du
BAT taldeko ordezkariak
- Ikastolako zuzendaria
- Ikasketaburuak
- Bizikidetza koordinatzailea (OBK)
- Aholkularia
- Orientatzailea
04 · Zer den jazarpena eta zer ez
Baina zer da eskola-jazarpena?
Eskola-jazarpena ikasle batek beste ikasle baten edo batzuen aldetik behin eta berriz ekintza kaltegarriak jasaten dituenean gertatzen da, denboran zehar.
Jazarpena ez da une bateko eztabaida edo liskar bat. Errepikatzen den eta pertsona bati kalte egiten dion egoera da.
Horregatik, garrantzitsua da eskola-jazarpena eta beste egoera batzuk ez nahastea:
- Eztabaida edo liskar puntualak
- Txantxa edo broma desegokiak
- Bi pertsonaren arteko gatazkak
- Diziplinarik gabeko jokabideak
- Eskolako materiala edo espazioa nahita kaltetzea
- Ikasketekiko interes falta
Horrelako egoerak ere konpondu behar dira, baina ez dira nahitaez eskola-jazarpena.
05 · 6 motak
Eskola-jazarpen motak
Jazarpena modu desberdinetan ager daiteke. Ez da beti kolpeak edo eraso fisikoak izaten.
-
Bazterketa eta marjinazio soziala
Pertsona bat nahita baztertzea edo bakarrik uztea, taldean parte hartzen ez uztea edo besteengandik isolatzea.
Adibidez:
- Norbaiti ez ikusiarena egitea.
- Taldeko jardueretan edo planetan parte hartzen ez uztea.
- Beti pertsona bera taldeetatik kanpo uztea.
- Pertsona bat sexuagatik, jatorriagatik, arrazagatik, desgaitasunagatik… baztertzea.
-
Ahozko erasoa
Hitzak erabiltzea beste pertsona bat iraintzeko, umiliatzeko edo min egiteko.
Adibidez:
- Norbait iraintzea.
- Pertsona bati buruz gaizki hitz egitea edo zurrumurruak zabaltzea.
- Goitizen iraingarriak erabiltzea.
- Norbait besteen aurrean barregarri uztea edo umiliatzea.
-
Eraso fisikoa
Beste pertsona bati fisikoki min egitea edo haren gauzak nahita kaltetzea.
Adibidez:
- Norbait jotzea, bultzatzea edo ostikatzea.
- Norbaiti bere gauzak ezkutatzea.
- Bere gauzak puskatzea edo hondatzea.
- Norbaiti gauzak lapurtzea.
-
Xantaia eta mehatxua
Beste pertsona bat beldurtzea edo presionatzea, nahi ez duen zerbait egitera behartzeko.
Adibidez:
- Norbait mehatxatzea.
- Mehatxuen bidez zerbait egitera behartzea.
- Pertsona baten beldurra edo ahultasuna erabiltzea hura kontrolatzeko.
- Indarkeriarekin edo arma batekin mehatxatzea.
-
Sexu-jazarpena eta jazarpen sexista
Pertsona bat sexuarekin edo generoarekin lotutako jokabideen bidez beldurtzea, umiliatzea edo molestatzea.
Adibidez:
- Nahi ez duen sexu-jokabide edo iruzkinak egitea.
- Pertsona baten gorputzari edo itxurari buruzko iruzkin sexualak egitea.
- Norbait sexuagatik edo generoagatik iraintzea, umiliatzea edo beldurtzea.
- Beste pertsona baten baimenik gabe intimitatea urratzea.
Pertsona batek «ez» esaten badu edo deseroso sentitzen bada, hori errespetatu egin behar da.
-
Ziberjazarpena
Internet, sare sozialak, mezularitza-aplikazioak edo beste baliabide digital batzuk erabiltzea beste pertsona bat jazartzeko, iraintzeko, mehatxatzeko edo umiliatzeko.
Adibidez:
- Sare sozialetan edo taldeetako txatetan irainak edo mehatxuak bidaltzea.
- Norbaiti buruzko zurrumurruak edo eduki iraingarriak zabaltzea.
- Pertsona bat barregarri uzteko argazkiak edo bideoak partekatzea.
- Beste pertsona baten intimitatea urratzen duten grabazioak egitea edo zabaltzea, bere baimenik gabe.
Internet bidez gertatzen denak ere ondorioak ditu. Pantailaren atzean egoteak ez du esan nahi beste pertsonari egiten diogunak gutxiago minduko duenik.
06 · 8 urratsak
Zer egin behar da jazarpen-kasu baten susmoa dugunean?
Norbaitek jazarpen-egoera bat dagoela uste badu, ez da isilik geratu behar. Ikastolan egoera aztertu eta beharrezko neurriak hartzeko prozedura bat dago.
-
Ikastolan jakinarazi
Egoeraren berri irakasle bati, tutoreari edo ikastolako beste pertsona bati eman.
-
BAT taldea informatu
BAT taldeak egoeraren berri jasotzen du eta egoera aztertzeko prozesua koordinatzen du.
-
Familiarekin hitz egin
Ustezko biktimaren familiarekin harremanetan jartzen gara, gertatzen ari denaren berri emateko eta informazioa partekatzeko.
-
Hezitzaile taldearekin bilera
Ikaslea ezagutzen duten irakasleekin informazioa partekatzen eta egoera aztertzen da.
-
Informazioa bildu
Egoera hobeto ezagutzeko, hainbat bide erabiltzen dira: behaketak, banakako tutoretzak, talde txikiko tutoretzak…
-
Beharrezko neurriak hartu
Helburua da ikaslea babestea eta ikastolan giro segurua bermatzea.
-
Jazarpena dagoen ala ez ebatzi
Bildutako informazioa aztertu ondoren, jazarpen-egoera dagoen ala ez erabakitzen da.
-
Beharrezko informazioa eman
Prozesuan zehar, familiei eta dagokien profesionalei egoeraren berri ematen zaie, betiere ikasleen pribatutasuna eta ongizatea zainduz.
Garrantzitsuena: zerbait gertatzen ari dela uste baduzu, esan. Ez duzu egoera bakarrik konpondu behar. Laguntza eskatzea ez da salatzea: norbait zaintzea da.
07 · Nora jo
Komunikazio kanalak
Zerbait gertatzen ari bada, ez isildu. Esan.
Egoera bat kezkatzen bazaitu, ez duzu bakarrik konpondu behar. Laguntza eskatu.
- Zure tutoreari
- Konfiantzazko irakasle bati
- Ikastolako beste heldu bati
- BAT taldeari
Zuk zeuk jasan baduzu, ikusi baduzu edo norbaiti gertatzen ari zaiola susmatzen baduzu, esan.
Hitz egitea ez da salatzea. Norbait zaintzea da.
Isilik ez geratu. Hitz egin.
08 · Familiak
Familiak
Jazarpena prebenitzea eta horrelako egoerei aurre egitea guztion ardura da. Horretarako, familien eta ikastolaren arteko elkarlana oso garrantzitsua da.
Horrek esan nahi du:
-
Komunikatzea
Zerbait gertatzen ari dela uste badugu, hitz egitea eta informazioa partekatzea.
-
Elkarrekin lan egitea
Ikastolak eta familiek norabide berean lan egitea, ikasleen ongizatea eta segurtasuna zaintzeko.
-
Elkarri laguntzea
Egoera zail baten aurrean, ez bilatzea errudunak bakarrik, baizik eta konponbideak elkarrekin aurkitzea.
Ikasle baten ongizatea guztion ardura da: ikasleena, familiena eta ikastolako profesionalena.
IDAZKARITZA · 9:00–13:00 eta 14:30–17:00 · UDA 9:00–14:00